2014ko urtarrilaren 13, 14, 22 eta 23an, Social Media Plangintza eta horretara dedikatzen diren Community Managerrei buruzko ikastaro trinkoa antolatu dugu, Leioan.

Sare sozialen bidez komunikazioa nola gauzatzen den eta zeintzuk diren bere osagarri teknikoak, estetikoak eta komunikatiboak landu ditugu, ikuspegi praktiko baten bidez.

Urte berriarekin batera burututako ikastaro honetan  NOR ikerketa taldeko hainbat partaidez gain, Multimedia Komunikazioa Masterreko zein Ikus-entzunezko Komunikazioa graduko ikasleek hartu dute parte.

Gainera, Transmedia ikerketa-proiektuarekin erlazio zuzena izanik, ikastaroa Donostiako Olatu Talka bezalako egitasmo baten inguruan artikulatu da, egun daukaten social media planaren diagnostikoa eta hobekuntzarako estrategien diseinua landuz, hain zuzen ere.

Tailerrean matrikulatu diren hogei bat lagunek, Eider Jauregi eta Libe Mimenzaren azalpenak jarraitzeaz gain, komunikazio plan baten oinarriak eta bideragarritasuna jorratu dituzte eta horiek Olatu Talkako komunikazio arduradunekin elkarbanatu.

Social Media Planak

Sareko komunikazioa lantzea erabakitzen duen edozein markak Social Media Plan bat behar du. Eta gaur egun, marka orok -izan produktu edo proiektu- sarean egon beharra dauka ezinbestean.

Bestalde, parte-hartzea oinarri duten proiektuetarako tresna aproposak eskaintzen ditu sareak, bai parte-hartze birtuala sustatzeko baina baita ere, parte-hartze fisiko aktiboa kanalizatzeko. Horregatik, Olatu Talka bezalako proiektu parte-hartzaile bat izan dugunez ikastaroan langai, hasieratik argi geratu da sareko komunikazioak plangintza bat behar duela eta estrategiak diseinatu behar direla gure helburuak lantzeko.

Lau eguneko ikastaroan sareko komunikazioaren egoera aztertu eta Social Media Plan baten garapena landu dugu. Social Media Plan batek izan behar dituen lau ardatz hauen inguruan:

1. Azterketa:  Gure markaren diagnostikoa egin behar da eta azterketa horretan ikusi nola ari garen gu eta zertan ari diren besteak, konpetentzia.
2. Helburuak: Sareko jardueraren helburu orokorrak definitu beharko ditugu, eta baita sarez sareko helburu zehatzak ere.
3. Estrategiak: Definitutako helburuak lortzeko estrategiak landu beharko ditugu irudimena erabiliz eta ekintzekin agenda metodologiko bat garatuz.
4. Emaitzen neurketa: Definitu ditugun helburuak lortzeko abiatutako estrategien emaitzak neurtu beharko ditugu, eta neurketarako gida bat zehaztu. Beti ere, emaitzen arabera, estrategiak beraztertzeko asmoz.